مغامرات غرفة الإنتظار
كنت قاعدة امبارح مستنية دوري عند الدكتور..لما واحدة ست دخلت و كان شكلها غضبان من الدنيا..قعدت و فضلت ترزع في الكراسي، حسيت باستفزاز فشيخ.. بعديها بشوية لقيتها بتكلمني و بتقول لي رُحتي انتخبتي؟ قُلتلها ايوه، قالتلي مين؟ قُلتلها حمدين قامت هزت راسها و قالتلي برافو عليكي و قالتلي طب في الإعادة قُلتيلها لو بين شفيق و مرسي يبقى مرسي، قالت لي جدعة!! و بدأت سلسلة من الشتايم في انصار شفيق و في شفيق و في النظام السابق، حكتلي عن بنت اخوها و قالتلي انها كانت محتاجة تُدخل مستشفى الأورام 57357
بتقول لي جابوا وسايط الدنيا.. راح مسوؤل هناك قال لها لازم ورقة من سوزان مبارك نفسها، قالت له حتى العيا؟ قال لها ايوه.. معرفوش يجيبوا ورقة منها و تاني يوم البنت توفت…
كُلنا شفنا ظلم في عهد ابن الكلب ده، و كلنا شُفنا ذل، أنا و الست اللي معرفهاش فِضلنا نتكلم… و فضلت تفضفضلي… و فضلنا نشتم و عيني دمعت و ضحكت و غضبت لها، و حسيت إن كان ليها حق تخبط في الكراسي.
قصة انسانة
امبارح كان يوم متعب و غريب، كنت بعمل توست بالتونا و المايونيز و الطماطم لما الباب خبط.. رحت اشوف مين، لقيتها ايمان، دخلت و باستني و حضنتني…
ايمان كانت بتاخد بالها من جدو الله يرحمه، تقريباً جزء من عيلتنا، وأنا وهي اقرب اتنين لجدو، و كانت جاية تطمن عليا، دخلنا المطبخ، عزمت عليها بتوست من اللي كنت بعمله، اخذته و رُحنا قعدنا على السفرة برا…
ايمان بالنسبة لي بطلة…بطلة شجاعة و قوية و عندها ٣ عيال بتخلي بالها منهم لواحدها، جوزها مات و هي حامل في عبد الرحمن.. اصغر ولد ليها، مات ازاي؟
و لا حاجة رجع من الشغل راح يريح على السرير، دخلت تندهله عشان الأكل..لقيته مبيردش…
ايمان كانت دايماً تفضل تحكيلي عنه و قد ايه كانوا بيحبوا بعض و قد ايه كان بيحترمها.. كانوا عايشين عيشة كانت دايماً بتتمناها…
كنا قاعدين على السفرة و بدأت تفضفضلي.. بتقول لي ان بنتها جابت مُلحَق في مادة و المدرس الأول في المدرسة عاوزها تدفع ٦٠٠ جنيه عشان ينجحها، اصل اللي مش بيدفع مش بينجح، ٦٠٠ جنيه كتير عليها طبعاً و هي الوحيدة اللي بتصرف على ولادها، ميراث جوزها ممكن يعيشها طول حياتها مرتاحة، لكن اخوات جوزها مش مخليينها تشوف مليم.
ايمان ضحية ناس جشعة مش بتفكر غير في نفسها، ضحية بلد مفيهاش قانون يخليها تاخد حقها من اخوات جوزها، ضحية منظومة فاسدة و تعليم فاسد و ناس حرامية لسانهم مدلدل و هم مستنيين الفلوس…
“الواحد كان شايف حياته حاجة و بقت حاجة تانية خالص، بس الحمد لله” ده اللي هي قالته…
أنا آسفة يا ايمان، أنا آسفة إن كل اللي اقدر اقدمهولك هو وعود بإن البلد حالها هيتصلح و إن الناس الوحشة هتمشي و بإن الحق هينتصر… حقيقي آسفة.
Like Ur Simple Page deh gamda 5alss
Thank you :) but why the anonymity?
WHAT MAKES YOU FEEL BETTER WHEN YOU ARE IN A BAD MOOD?
Why are you shouting?? I won’t answer you *trollface*
الرحيل
في يوم هشتري شنطة من شنط زمان..
و البس فستان طويل كله ورد، و شبشب عشان التراوة، و آخذ معايا كتاب حلو و سكيتش بوك و أقلام
و أقرر الرحيل…